Risitë e taksës së pronës – Tatimet njoftim për ndërtuesit: Ja çfarë ndryshon për investitorët

Menjëherë pas publikimit të ndryshimeve në përllogaritjen e tatimfitimit për kalimin e pronësisë të pasurive të paluajtshme, Administrata Tatimore ka vënë në dijeni ndërtuesit për risitë kryesore që prekin këtë treg. Përmes një njoftimi zyrtar, Tatimet sqarojnë se investitorët në biznesin e ndërtimeve, të cilët janë regjistruar në organet tatimore si persona juridikë, (shoqëri tregtare) me objekt ndërtimin dhe shitjen e pasurive të paluajtshme, nuk janë subjekt i “tatimit” mbi të ardhurat personale nga kalimi i së drejtës së pronësisë mbi pasuritë e paluajtshme. Ata janë subjekt pagues vetëm të “taksës” vendore mbi kalimin e së drejtës së pronësisë për pasuritë e paluajtshme;

Ndërkaq, Investitorët në biznesin e ndërtimeve, të cilët janë regjistruar në organet tatimore si subjekte me status “person fizik tregtar”, janë subjekt i “tatimit” mbi të ardhurat personale nga kalimi i së drejtës së pronësisë mbi pasuritë e paluajtshme. Ata janë gjithashtu subjekt pagues të “taksës vendore” mbi kalimin e së drejtës së pronësisë për pasuritë e paluajtshme;

Tatimet nënvizojnë gjithashtu se udhëzimi garanton një trajtim më të plotë dhe gjithëpërfshirës në lidhje me transaksionet e pasurive të paluajtshme të fituar me trashëgimi, dhe vendime gjyqësore si dhe për ato prona të cilat i janë nënshtruar proceseve të rivlerësimit, duke garantuar një trajtim të drejtë përsa i përket përllogaritjes së tatimit të kalimit të drejtës së pronësisë.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.