Rizgjidhet në krye të PD, Basha: Besimin do t’ua shpërblej me punë

Është rizgjedhur përsëri kryetar i Partisë Demokratike Lulzim Basha i cili kishte kundërshtar Eduard Selamin.

Pas votimit të 60 mijë anëtarëve të PD më 22 korrik, Basha është rizgjedhur edhe një herë në krye të Partisë Demokratike.

Në një dalje për median Basha ka falenderuar të gjithë anëtarët e PD që u bënë pjesë e procesit dhe ju ka premtuar se do të punojë me përkushtim që kjo forcë politike të japë kontributin e saj për të ardhmen e vendit.

Më tej Basha është shprehur se i di kritikat dhe brengat e të gjithë anëtarëve të PD, por ai premton se vendimmarrja do të jetë në duart e anëtarëve të saj ashtu siç ishte edhe votimi për zgjedhjen e kryetarit të saj.

Basha nuk ka harruar të falenderojë as kundërshtarin e tij i cili solli një program dhe një vizion për drejtimin e PD.

Ndërkohë që më herët kandidati për kryetar i Partisë Demokratike, Eduard Selami, i cili humbi zgjedhjet përballë Lulzim Bashës, tha se pranon rezultatin dhe se i ka uruar fitoren.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.