Rregulla të forta në tregun e verës – Drafti/ Kritere për prodhimin dhe tregtimin, formalizim i sektorit
Qeveria do të vendosë rregulla të forta në tregun e prodhimit dhe tregtimit të verës, për të siguruar konkurrencë të drejtë ndërmjet prodhuesve dhe operatorëve të tjerë në këtë sektor, duke tentuar që të minimizojë abuzimet që ndodhin aktualisht. Ministria e Bujqësisë ka hedhur për konsultim projektligjin “Për Vreshtarinë dhe Verën” , i cili ka si qëllim që veç të tjerave të ngrejë regjistrin e vreshtarisë, të kontrollojë prodhimin, etiketimin, marketingun dhe të sigurojë kontrollin e produkteve të verës vendase, me qëllim përshtatjen me kërkesat dhe standardet e tregut ndërkombëtar.
Po ashtu, qëllim është mbrojtja e interesave të konsumatorëve në cilësinë e produktit që konsumojnë. Sipas relacionit, ky ligj do ti hapë rrugë formalizimit të plotë të sektorit nga prodhuesi deri tek përfituesi përfundimtar, rritjes së konkurueshmërisë së produktit, uljes së importit. Tregu i verës është ndoshta ndër më informalët nga të gjitha industrisë e tjera. Kjo për shkak se është një treg relativisht i ri në standarde dhe hapësirat për abuzime janë të mëdha.
Po ashtu, ndërhyrjet në legjislacion dhe kontrolli nga strukturat përgjegjëse ka munguar, duke nxitur konkurrencën e pandershme si dhe deri diku mungesën e cilësisë. E gjithë industria e verës përfshirë prodhimin vendas dhe importin vlerësohet të ketë një volum tregtar prej rreth 2 miliardë lekë ose rreth 15 milionë euro në vit, ku pjesën më të madhe e zë prodhimi i huaj.
Aktualisht ky treg është i ndarë në thuajse 30% prodhim vendas dhe 70% import. Në Shqipëri prodhohen në vit rreth 2 milionë litra verë dhe sipas prodhuesve në të gjithë vendin janë rreth 100 kantina serioze, ndërsa vetëm rreth 10 prej tyre kanë prodhim sasior më të lartë dhe në normat e prodhimit të standardeve që kërkon kjo industri.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.