Rregulla të reja për guroret – Klosi: Larg qendrave të banuara dhe zonave turistike e historike

Guroret tashmë do të zhvillojnë aktivitetin e tyre bazuar mbi një rregullore të re. Metodologjia e re e funksionimit të tyre është prezantuar nga ministri i Turizmit dhe Mjedisit, Blendi Klosi, sipas të cilit aktiviteti i guroreve nuk mund të zhvillohet në kundërshtim me mjedisin.

Kjo ka ardhur pas mbylljes së më shumë se 30 guroreve dhe pezullimit të aktivitetit të disa të tjerave.

Sipas rregullores, guroret duhet të kenë një distancë të përcaktuar nga zonat e banuara, ku nuk duhet të ushtrojnë aktivitetin pranë këtyre të fundit si dhe pranë akseve kombëtare.

Ndërkohë, duhet të zbatojnë një sërë kriteresh të tjera në mënyrën e shfrytëzimit por edhe rehabilitimit pas mbylljes së tyre. Guroret, po ashtu nuk duhet të jenë të vendosura pranë kanaleve kulluese apo lumenjve.

“Po ashtu problem është afërsia me qytetet, apo afërsia me zonat historike apo  turistike apo komunitetin. Nuk mund të jetohet më që njerëzit të jetojnë nën presionin e tymit apo gurores. Ka ardhur koha që këtë bisedë ta bëjmë fare të sinqertë me njëri- tjetrin, ju të bëni biznes dhe ky biznes të jetë i monitoruar, i mbrojtur, i zhvilluar”, u shpreh Klosi.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.