Rregullat e reja për të drejtat e autorit/ Ministria e Kulturës hedh për konsultim publik draftin e ri
Ministria e Kulturës ka hedhur për konsultim publik projektligjin “Për të drejtat e autorit dhe të drejtat e tjera të lidhura me to”, në të cilin parashikohet krijimi i një “regjistri online” të një baze të dhënash të veprave pa autor. Ky regjistër do të jetë nën administrimin e Drejtorisë për të Drejtën e Autorit dhe për ngritjen e mirëmbajtjen e tij është parashikuar një kosto prej afro 22 milionë lekësh. Sipas dokumentit të hedhur për konsultim publik, ky rregullator do të sjellë ndikim si ekonomik ashtu edhe social.
Ndikimi ekonomik i opsionit të preferuar do të përfshijnë:
- Kosto direkte në buxhetin e shtetit, të cilat lidhen me krijimin dhe administrimin e bazës së të dhënave të vetme publike online për veprat pa autor.
- Përfitim indirekt për buxhetin e shtetit nëpërmjet të ardhurave që do të përfitohen nga vënia në përdorim e veprave pa autor nga institucionet shtetërore.
- Kosto indirekte për institucionet të lidhura me ndërmarrjen e kërkimit shterues.
Ndikim social
- përfitime kulturore për shoqërinë përmes ruajtjes kulturore;
- rritja e aksesit të një game të gjerë veprash;
- përfitime nga kërkimet e mëparshme shteruese të cilat krijojnë siguri juridike për organizatat që përdorin vepra pa autor.
- përfitimet kulturore për personat të cilët janë të verbër, me shikim të dëmtuar ose ndryshe me aftësi të kufizuara në leximin e materialeve të printuara përmes ruajtjes kulturore;
- aksesi i zgjeruar për personat të cilët janë të verbër, me shikim të dëmtuar ose ndryshe me aftësi të kufizuara në leximin e materialeve të printuara në vepra të ndryshme;
- garantim i mbrojtjes së të drejtave të të gjithë autorëve;
- garantim i menaxhimit të thellë dhe profesional;
- garantohet përfaqësia e të gjithë aktorëve të interesuar në mbrojtjen dhe zbatimin e të drejtave të autorit;
- garantohet bashkëpunimi mes AAK-ve përmes një ambienti të përshtatshëm për respektimin e këtyre të drejtave;
- garantimi i transparencës në sistemin e administrimit kolektiv të të drejtave të autorit dhe të drejtave të tjera të lidhura me to.
Projektligji synon përshtatjen e dispozitës, me qëlim përafrimin e direktivave të Bashkimit Europian.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.