Rregullat fiskale në BE – Komisioni ndërmerr hapin e parë drejt ndryshimit të tyre
Komisioni Europian mori hapin e parë drejt ndryshimit të rregullave fiskale, duke nisur një konsultë publike për të arritur në një dakordësi mes qeverive të ndara të Bashkimit Europian. Rregullat komplekse të quajtura “Pakti i Stabilitetit dhe Rritjes”, theksojnë se defiçiti buxhetor i qeverive duhet të mos kalojë 3% të PBB dhe borxhi publik të jetë poshtë 60% të Produktit të Brendshëm Bruto. Qasja e shkujdesur nga disa qeveri dhe mashtrimi në statistika nga Greqia, shkaktuan krizën e borxhit sovran në vitin 2010, që thuajse shkatërroi eurozonën.
Kjo i la vendet anëtare të ndara, ndërkohë që vendet veriore me financa strikte akuzojnë ato në jug për shpërdorimin e parasë. “Presim një diskutim të hapur për mënyrën se si të arrijmë në një konsensus për rregullat dhe si ti bëjmë ato më efektive”, tha një zyrtar i lartë i BE. Komisioni do të mbledhë përgjigjet dhe do të japë propozime në fund të 2020-s. Limiti i borxhit dhe defiçitit do të qëndrojë, por BE synon të thjeshtëzoje rregullat dhe të përqendrohet në metrika që kontrollojnë qeveritë, si shpenzimet në raport me rritjen e PBB.
Rregullat përdorin aktualisht tregues si hendeku i prodhimit, që janë teorike, rishikohen shpesh dhe nuk kontrollohen nga qeveritë. Komisioni ka pranuar gjithashtu se sistemi aktual nuk i jep qeverive incentiva për të kursyer në kohë të mira dhe promovuar investimet. Të caktuara në vitin 1997 për të limituar huamarrjen, rregullat kanë kaluar 3 ndryshime që prej atëherë. E para, në vitin 2005, u soll nga Gjermania dhe Franca, që refuzuan të pranojnë masa të disiplinës kundrejt tyre. Dy ndryshimet e tjera erdhën në 2011 dhe 2013, për të qetësuar tregjet financiarë që u goditën nga kriza e borxhit sovran. Ndryshimet i dhanë komisionit më shumë fuqi për të monitoruar dhe gjobitur qeveritë. Megjithatë, Komisioni dështoi të sanksionojë Francën, Portugalinë, Italinë dhe Spanjën.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.