Rregullimi bankar në Eurozonë, Sejko: Po frenon kreditimin edhe në Shqipëri

Shtrëngimet rregullatore për grupet bankare të Eurozonës janë ndër faktorët po pengojnë rritjen e kreditimit në Shqipëri.

Guvernatori i Bankës së Shqipërisë, Gent Sejko, tha gjatë një konference të organizuar në bashkëpunim me Fondin Monetar Ndërkombëtar, se rregullimi i ri bankar në Eurozonë, në një afat të shkurtër, përfaqëson një sfidë për sistemet bankare në vendet e Ballkanit Perëndimor.

Koeficientët e lartë të rrezikut për investimet në këto tregje kanë bërë që bankat e grupeve të Eurozonës në rajonin tonë të frenojnë kreditimin.

Konferenca që do të zhvillohet përgjatë dy ditëve në Tiranë ka në qendër efektin e normave negative të interesit në Eurozonë te politikat e Bankave Qendrore të Ballkanit Perëndimor.

Guvernatori Sejko tha se normat negative të interesit në Eurozonë kanë sjellë përfitime edhe në rajon, për sa kohë kanë parandaluar deflacionin dhe kanë favorizuar flukset hyrëse të kapitalit, përmes investimeve të huaja.

Megjithatë, normat negative të interesit kanë shkruar edhe sfida serioze, të lidhura me dilemat e përcaktimit të kufurit të poshtëm të normës bazë apo për menaxhimin e likuiditetit nga bankat qendrore dhe ato tregtare të vendeve të rajonit.

Konferenca e nisur të enjten do të ofrojë mundësi për politikëbërësit dhe përfaqësuesit e lartë nga bankat qendrore të vendeve të Ballkanit Perëndimor që të shkëmbejnë pikëpamje për sfidat që lidhen me politikën monetare, stabilitetin financiar dhe administrimin e rezervës valutore.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.