Rreziqet e rritjes së pagës minimale – Guxholli: Shkurton vende pune, duhen politika specifike për sektorë të veçantë
Ndërsa qeveria parashikon që duke nisur nga Janari i vitit të ardhshëm, paga minimale në shkallë vendi të rritet në 30 mijë lekë nga 26 mijë lekë që është aktualisht, ekspertët e ekonomisë paralajmërojnë rritje të kostove të biznesit dhe shkurtim vendesh pune, sidomos në industrinë fasone. Suzana Guxholli thekson se pavarësisht përfitimeve në rritjen e konsumit, do të prekë bizneset që shfrytëzojnë krahun e lirë të punës.
“Kjo është një nisëm e cila është optimiste sepse të rrit paratë në xhepat e konsumatorit gjë që sjell rritjen e konsumit dhe një përmirësim të gjendjes së tij ekonomike. Por kjo ka dhe anën e të bërit biznes. Biznesit i rëndohet kosto dhe i rriten shpenzimet, sepse rritja e pagës minimale, sidomos për bizneset e brishta të tipit fasonë, të cilët punojnë me rroga shumë të ulëta. Rritja pagave në këtë sektor i nxjerr ata jashtë tregu. Pra biznesi fason goditet dhe do të shohim pasojat që do të kenë. Tani ky sektor i ka pagat dhe më të ulëta se ajo minimale, dhe kush është pasoja e rritjes së tyre, rritja e papunësisë”, është shprehur Guxholli.
Për këtë qëllim, Guxholli propozon që për sektorët më të prekshëm të ndërmerren politika specifike në mënyrë që të amortizohen kostot që vijnë nga rritja e pagës minimale.
“Qeveria përpara se te ndërmarrë këto fishekzjarre elektorale, do ishte mire te konsultohej me biznesin dhe të ndërmarr politika komplekse në këtë drejtim. Duhet të ndërmarrë iniciative nxitëse në sektorët që i godet dhe u rrit koston e të bërit biznes“, ka thënë ajo.
Edhe më herët ekspertë të fushës kanë bërë apel që të shikohet me kujdes kjo lëvizje, për shkak të efekteve bumerangë që mund të sjellë në rritjen e informalitetit dhe thellimin e krizës tek bizneset.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.