Rrëzohet dekreti i Metës për dënimet – Ralf Gjoni: Problemi i vërtetë politikanët problematikë, jo qytetarët problematikë

Kuvendi ka rrëzuar me votat e mazhorancës Dekretin e Presidentit të Republikës, Ilir Meta që ktheu për rishqyrtim në Kuvend ndryshimet në Kodin Penal të cilat ashpërsojnë dënimet për një sërë shkeljesh të ligjit, duke nisur nga dhuna apo kërcënimet ndaj zyrtarëve publike, te mbajtja pa leje e armëve e municioneve, e deri te shkeljet e sigurisë ushqimore. Ministrja e Drejtësisë Etilda Gjonaj tha se vitet e fundit janë shënuar vepra të rënda penale të këtyre llojeve, të cilat kërkojnë edhe ashpërsim të dënimeve për to.

Gjatë fjalës së tij, Ministri i Brendshëm Sandër Lleshaj tha se dënimi për armëmbajtje pa leje duhet të shkojë deri në 15 vite burgim për shkak të dëmeve të rënda që ka shkaktuar në shoqëri.

Deputeti i opozitës Ralf Gjoni tha se edhe vetë Presidenti i konsideron ashpërsimet e dënimeve për këto vepra penale në përgjithësi pozitive, duke nënvizuar se ka një mirëkuptim politik lidhur me ndryshimet në Kodin Penal. Por Gjoni tha se shqetësim i vërtetë për shoqërinë shqiptare nuk janë qytetarët problematikë, por politikanët që përmes abuzimeve e korrupsionit kanë rrënuar vendin, dhe se duhet të jenë këta të fundit që duhet të përballen me dënime të rënda.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.