Rrëzohet dekreti për ligjin e “buxhetit 2021”. Komisioni i Ekonomisë dhe Financave e vlerëson të përshtatshëm
Komisioni për Ekonominë dhe Financat rrëzoi dekretin e presidentit të Republikës për ligjin e buxhetit të viti 2021. Këshilltari i presidentit, Bledar Dervishi, pas përsëritjes së argumenave të përdorura në dekret, theksoi se ky buxhet nuk pasqyron realisht situatën ekonomike dhe nuk përmbush pritshmeritë, lidhur me rimëkëmbjen ekonomike apo edhe masat për të luftuar Covid-19.
“Alokimi i fondeve buxhetore por mbi të gjitha edhe mënyrat se si analizohen dhe orientohen politikat buxhetore dhe fiskale lidhen drejtpërdrejt me mundësimin e respektimit të parimeve kushtetuese. Si pasojë, ky buxhet sipas analizës që kemi bërë nuk mundëson mbështetjen e nevojshme buxhetore për të bërë ca është e mundur për të ruajtur shëndetin e popullatës nga sëmundja e COVID-19 dhe nuk garanton mbrojtjen e dinjitetit dhe personalietit njerëzor për krijimin e kushteve për punësim, për shëndetësi cilësore dhe mirëqënie.”
Deputeti, njëkohësisht edhe relatori në komision, Anastas Angjeli hodhi poshtë argumentat duke thënë se shumica e tyre janë konstatime. Sipas Angjelit, miratimi i buxhetit i vjen në ndihmë luftës kundër Covid-19, duke theksuar se vonesat sjellin efekt të kundërt edhe në rindërtimin ekonomik të vendit.
“Asnjë nga këto nene të Kushtetutës që përcaktojnë mënyrën e planifikimit buxhetor të diskutimit, miratimit nuk është përmendur në argumentet që ka sjellë Presidenca për të rrëzuar Buxhetin e vitit 2021.Unë besoj që miratimi sa më shpejt i Buxhetit për vitin 2021 i vjen në ndihmë luftës kundër COVID-19. Çdo ditë vonesë për miratimin e këtij ligji dhe hyrjen në fuqi të tij bëjnë të kundërtën. Vonesa e hyrjes në fuqi dhe fillimit të zbatimit të Buxhetit 2021 është në të njëjtën kohë edhe një frenim për zhvillimin ekonomik të vendit.”
E pranishme në komision ishte edhe ministrja e Financave dhe Ekonomisë, Anila Denaj e cila u ndal mbi disa objektiva për vitin e ardhshëm, siç është rritja e të ardhurave dhe e Prodhimit të Brendshëm Bruto.
“Sigurisht që të ardhurat mbi PBB në raport me rajonin janë më të ulëta. Kjo vjen e trashëguar prej vitesh dhe vjen gjithsesi e rritur nga viti 2014. Nga 24% në 27.8% dhe është pjesë e një politike afatmesme të punuar së bashku me FMN-në këtë vit për të implementuar një projekt afatmesëm për rritjen e të ardhurave dhe jam e bindur që vitin e ardhshëm ky objektiv do fillojë të zbatohet për të synuar një rritje të të ardhurave mbi PPB-në me të paktën 3% ku një pjesë e konsiderueshme është mirë-administrimi fiskal që është një pjesë e rëndësishme e vitit që vjen. ”
Më herët, këshilltari i Presidentit të Republikës, Petraq Milo foli për një performancë të ulët të të ardhurave dhe të rritjes ekonomike, krahasuar me vendet e rajonit.
Nertila Doko / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.