Rriten azilkërkuesit shqiptarë – Me 9% gjatë periudhës prill-qershor, shkak kriza politike

Azilkërkuesit shqiptarë drejt vendeve të Bashkimit Europian janë rritur me plot 9% gjatë tremujorit të dytë të këtij viti në krahasim me tremujorin paraardhës, tregojnë të dhënat më të fundit të publikuara nga Eurostat.

Rezulton se, gjatë periudhës Prill-Qershor, 5955 shtetas shqiptarë kanë aplikuar për herë të parë për azil në një prej vendeve të Bashkimit Europian, ndërkohë që në tre muajt e parë të vitit këto kërkesa ishin rreth 500 më pak.

Shqiptarët vijojnë të mbeten grupimi më i madh azilkërkues në Europë me origjinë europiane, dhe në rang global renditen të gjashtit.

Sipas eurostat, azilkërkuesit shqiptarë janë më të shumtë në numër sesa ata nga Eritrea apo Bangladeshi. Kjo tabelë tregon qartë sesi vendet e tjera problematike në rajon, si Kosova apo Maqedonia kanë zbritur në fund të listës, ndërkohë që Serbia është zhdukur plotësisht.

Gjatë 12 muajve të fundit, sipas Eurostat, rezultojnë 27 mijë e 420 azilkërkues shqiptarë në dyert e Europës. Në rang europian ndërkohë, numri i azilkërkuesve ka rënë gjatë tremujorit të dytë, me 11%, çka tregon se, tendenca për tu larguar nuk është dukuri sezonale, por veçori shqiptare.

Tremujori i dytë i vitit përkon me krizën e rëndë politike që mbërtheu vendin dhe pasigurinë e prodhuar përpara zgjedhjeve parlamentare të Korrikut, çka ka ndikuar edhe në largimin masiv të Shqiptarëve drejt Europës.

Pjesa më e madhe janë larguar drejt Francës, mbi 3200, duke u bërë azilkërkuesit numër një në këtë vend, dhe duke zënë 15% të totalit. Erdhe në Islandë shqiptarët janë të parët.

Ajo që bën çudi është gjithashtu përfshirja e shqiptarëve në listën e azilkërkuesve më të mëdhenj në Greqi, duke zënë 6% të totalit.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.