Rriten fondet speciale/ 3-mujori, 20.6 mld lekë nga sigurimet shoqërore e shëndetësore

Të ardhurat nga fondet speciale ku përfshihen sigurimet shoqërore dhe ato shëndetësore  në buxhetin e shtetit janë rritur këtë fillim viti. Duke iu referuar të dhënave zyrtare  të Ministrisë së Financave, vetëm për 3 muajt e parë të vitit janë arkëtuar  në buxhetin e shtetit 20.6 miliardë lekë, ose 1.3 miliardë lekë më shumë se e njëjta periudhe e një viti më parë, ku vlera e tyre ishte 19.3 miliardë lekë.

Po sipas këtyre të dhënave, të ardhurat nga sigurimet shoqërore  janë ato që shënojnë dhe vlerën më të madhe të realizimit me 17.8 miliardë lekë për këtë periudhë, ndërsa sigurimet shëndetësore janë realizuar në 2.7 miliardë lekë.

Ndërsa këto zëra një vit më parë ishin përkatësisht në vlerat, sigurimet shoqërore 16.2 miliardë lekë dhe sigurimet shëndetësore në 2.6 miliardë lekë. Aksioni ndaj informalitetit i nisur  dy vite më parë nga qeveria dha efekte pozitive në skemën e sigurimeve shoqërore, por “ambicia” e  qeverisë ka qenë më e madhe.

Nga  përfaqësues të qeverisë është deklaruar se gjatë këtij viti ka pasur mijëra persona më shumë të deklaruar si të punësuar dhe që paguajnë kontributet e sigurimeve shoqërore. Por sipas analizave të bëra këto nuk  janë të gjitha vende të reja pune.

Disa janë vende të reja pune, të tjerat janë vende pune që janë zbardhur nga puna në të zezë.  Kjo shihet nga  ndryshimi i madh që ka në të ardhurat nga sigurimet shoqërore krahasuar me një vit më parë.  Por kjo skemë vazhdon të  financohet nga buxheti i shtetit, ku shpenzimet  për këtë zë për  këtë periudhë  janë në vlerën  e 37.4  miliardë lekëve.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.