Rriten infeksionet në Itali. Ushtria hap një nga qendrat më të mëdha të testimit ndaj Covid-19
Ushtria italiane ka hapur një nga njësitë më të mëdha të testimit të koronavirusit në nisje të Javës, ndërkohë që numri ditor i të infektuarve është rritur ndjeshëm. Njësia e testimit në makinë, në hyrje të Romës, do të trajtojë thuajse 400 makina njëherësh, me një numër gjigant prej rreth 30,000 testimesh çdo ditë. Qendrat e testimit në Itali kanë hasur vështirësi për t’i bërë ballë numrit të madh të njerëzve që kërkojnë të marrin tamponin dhe të sigurojnë nëse janë infektuar me virusin.
Rreshtat e makinave janë krijuar në qendra dhe njerëzit kanë pritur në radhë deri në 6 orë, përpara se të monitorohen. Në 24 orët e fundit, autoritetet raportuan një record të ri ditor prej 21,273 rastesh, si dhe 128 vdekje. Masa të reja do të prezantohen në nisje të Javës, që do të mbyllin baret dhe restorantet nga ora 6 e pasdites, si dhe mbyllin tërësisht palestrat, kinematë dhe pishinat, për të ndaluar përhapjen e shpejtë të koronavirusit.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.