Rriten investimet e huaja – 3.6% në vitin 2017, por me korrigjim statistikash

Investimet e huaja direkte vitin e kaluar arritën vlerën e 970 milionë eurove. Sipas statistikave të Bankës së Shqipërisë, investimet e huaja mbyllën një tjetër vit në rritje, me rreth 3.6% më shumë krahasuar me vitin 2016.

Në fakt, tremujori i katërt 2017 nuk ishte shumë i mirë dhe investimet e huaja pësuan rënie krahasuar me të njëjtën periudhë të vitit 2016. Megjithatë, rritja vjetore e investimeve të huaja ka ardhur pas rishikimit të të dhënave të publikuara më parë në bilancin e pagesave.

Në veçanti, fluksi i investimeve të huaja në tremujorin e tretë të vitit të kaluar është rishikuar në rritje nga Banka e Shqipërisë, ndërsa vlera e vitit 2016 është korrigjuar në rënie. Me këtë korrektim statistikor, rezulton se investimet e huaja ruajtën tendencën rritëse edhe gjatë vitit 2017.

Besohet se edhe vitin e kaluar, rritja e investime u mbështet sidomos nga projektet madhore në sektorin energjetik, por edhe nga industria nxjerrëse dhe nga shërbimet financiare.

Kryesisht, bëhet fjalë për ndërmarrje dhe projekte ekzistuese. Avancimi i punimeve në projektet energjetike dhe hyrja në ciklin rënës të investimit ngre pikëpyetje nëse ekonomia shqiptare do të arrijë të thithë shifra të krahasueshme të investimeve të huaja edhe për vitet e ardhshme.

Pas vitit 2013, vlerat e larta të investimeve të huaja kanë qenë ndër kontribuuesit kryesorë të rritjes ekonomike në Shqipëri.

Një tjetër burim i rëndësishëm të ardhurash për ekonominë, dërgesat e emigrantëve, po rezistojnë ende në rritje. Për tremujorin e katërt, emigrantët sollën 172 milionë euro në ekonominë shqiptare.

Ndërsa për të gjithë vitin 2017, kjo shifër arriti në 636 milionë euro, me një rritje me 3.4% krahasuar me vitin 2016. Që nga viti 2015, vlera e remitancave i është kthyer rritjes, pas rënies së ndjeshme gjatë viteve të para të krizës ekonomike të Eurozonës.

Megjithë këto përmirësime, shifrat janë larg rekordit prej 950 milionë eurosh në vit që regjistrohej në mesin e viteve 2000. Në Shqipëri, trajektorja e rënies së remitancave po rezulton e zbutur, edhe për shkak të varësisë që një pjesë e madhe e familjeve kanë nga këto të ardhura.

Banka e Shqipërisë vlerëson se remitancat përdoren kryesisht për konsum, por edhe për mjekim, arsim, apo investime në pasuri të paluajtshme.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.