Rriten investimet publike në 5 muaj – Shpenzimet kapitale 9.1 mld lekë më shumë se 2016
Investimet elektorale janë ato që diskutohen më tepër nga opinion publik çdo vit që korrespondon me zgjedhjet parlamentare.
Duke analizuar shifrat e shpenzimeve kapitale në vite, vihet re se këtë fillim vit ka patur një rritje të investimeve publike.
Kështu referuar të dhënave të Ministrisë së Financave, shpenzimet kapitale për 5 mujorin e vitit 2017, paraqesin një realizim në masën rreth 22 miliard lekë.
Krahasuar me të njëjtën periudhë të vitit 2016, ky zë është rreth 9.1 miliard lekë më shumë. Po sipas këtyre të dhënave, realizimi me financim te brendshëm është në vlerën e 14.1 miliardë lekëve, ndërsa investimet me financim të huaj për këtë periudhë arrijnë në 7.9 miliardë lekë.
Duke parë këto të dhëna dalin dy anë, ose ka një mirëmenaxhim të financave publike, ose të qenurit vit elektoral ka nxitur vënien në eficencë të investimeve.
Kjo pasi mosrealizimi i investimeve publike gjatë viteve të fundit ka qenë një ndër problematikat e manaxhimit të buxhetit të shtetit.
Për disa vite rresht ministria e Financave është detyruar të përdorë në fund të viti letër kreditë, si një instrument financiar, për të bërë të mundur realizim e shpenzimeve kapitale.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.