Rriten lehtë azilantët shqiptarë – Lirimi i masave bllokuese nxit trendin, 505 shqiptarë aplikuan në korrik
Të dhënat e korrikut tregojnë një rritje për të dytin muaj me radhë të kërkesave për azil të shqiptarëve në një prej shteteve të Bashkimit Europian. Në total bëhet fjalë për 505 kërkesa në total, ku përfshihen jo vetëm ata që aplikojnë për herë të parë, dhe që në total janë 366, por edhe përsëritësit. Pandemia solli një rënie të ndjeshme të trendit të azilantëve, kryesisht si rrjedhojë e bllokimit të qarkullimit në pjesën dërrmuese të Europës.
Kulmi arriti në muajin maj, ku u regjistruan vetëm 90 kërkesa për azil nga shtetas shqiptarë. Qershori dhe korriku, që përkojnë edhe me lirimin e masave bllokuese, kryesisht sa i përket transportit, kanë sjellë një rritje të ndjeshme të numrit të azilkërkuesve, paçka se mbeten ende shumë larg niveleve të para pandemisë. Rritja gjatë këtyre dy muajve nuk ka sjellë rritje të numrit të shqiptarëve që janë në pritje të një vendimi, dyerve të Europës. Aktualisht, këta të fundit janë rreth 4680, në rënie për të 8-tin muaj me radhë, dhe shumë larg niveleve të një viti më parë, kur shifra fiksohej në rreth 13 mijë individë.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.