Rriten ndjeshëm rastet gjatë dy javëve të fundit – Komiteti i Ekspertëve: Shqyrtohen provimet në auditorë, shtyhen fluturimet me Britaninë

Komiteti i eksperteve po ndjek në mënyrë të vazhdueshme çdo ditë dinamikën e situatës epidemiologjike të infeksionit me virusin Sars-Cov-2 në vend por edhe në botë, në Europë edhe në rajon duke nxjerrë konkluzione mbi bazën e ndryshimit të indikatorëve monitorues të kësaj situate çdo dy javë në mënyrë që mbi bazën e këtyre vlerësimeve të propozojë në kohën e duhur masat për përballjen e dinamikës së këtij infeksioni.

“Këto javë kanë shënuar rritje të rasteve ditore, të shtrimeve në spital si dhe të humbjeve të jetës. Këtë javë vërejmë një rritje të numrit të rasteve, incidenca javore është rritur në 209 raste për 100 mijë banorë, një incidencë e cila tregon një rritje drastike” ka thënë Silva Bino.

“Nga ana tjetër vërejmë edhe një rritje të incidencës dyjavore, e cila shkon deri 378 raste për 100 mijë banorë. Nuk kemi vetëm rritje të incidencës por kemi rritje të numrit të shtrimeve në spital dhe rritje të humbjeve të jetës. Rritja më e madhe vihet re në Tiranë por edhe në rrethe të tjera të vendit si Durrës, Fier, pavarësisht se incidenca më e larte vihet re në bashkinë e Sarandës dhe në disa bashki të tjera”, ka shtuar ajo.

“Aktualisht po vërehet një rritje të rasteve në të gjitha grupmoshat, e cila tregon që kemi një rritje të mirëfilltë të rasteve pas festave të janarit”, përfundoi Bino.

“Nga informacionet që jepet nga ministria e Shëndetësisë është parë një rritje i personave të infektuar që pasqyrohet në shtrimet në spital, ku pacientët janë në formën mbi të moderuar.  Shtrimet tregojnë një trend në rritje në gjithë vendin dhe ka persona të gjitha moshave të shtruar në spital”, u shpreh Najada Como.

Kjo rritje sipas Komitetit të Ekspertëve ka lidhje me moszbatimin e masave të festave të fundvitit si dhe në javën e parë të janarit.

Fatmirësisht situata mbetet e kontrolluar dhe për këtë arsye do të vazhdojë të mbeten të bllokuar fluturimet me Britaninë e madhe deri në një vendim të dytë.

Për sa i përket mësimit online, Komiteti i Ekspertëve po punon së bashku me Ministrinë e Arsimit për të vlerësuar mundësitë konkrete për sa i përket sezonit të provimeve dhe zhvillimit të tyre në auditorë, dhe do të kemi një vendim deri në fund të kësaj jave.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.