Rriten ndjeshëm rastet në Europë! Infeksioni po përhapet me ritme të shpejta, të gjithë e përjashtojnë rimbylljen
Pjesa më e madhe e shteteve europiane po raportojnë një rritje të ndjeshme të rasteve me covid-19. Gjatë 24 orëve të fundit, Franca raporton rreth 4700 raste, Spanja rreth 3700, Gjermania rreth 1700, ndërsa Italia raporton rritjen e radhës ditorë të rasteve të reja, në mbi 800 të tilla. Por, thuajse të gjithë liderët europianë e kanë bërë të qartë se izolim tjetër nuk do të ketë, pasi asnjë prej ekonomive nuk do të mund ta përballonte dot.
“Politikisht ne duam të shmangim mbylljen e kufijve me çdo kusht, por që të arrijmë këtu duhet të bashkëpunojmë ngushtë me njëri-tjetrin”-deklaroi së fundmi Angela Merkel gjatë vizitës në rezidencën verore të presidentit francez, Emmanuel Macron. Rritja e rasteve të reja të infeksionit gjatë ditëve të fundit në Europë vjen kryesisht si pasojë e grumbullimeve të njerëzve por edhe e udhëtarëve që vijnë nga vendet më të prekura, sidomos nga Ballkani.
Në qytetet kryesore të Parisit, maskat janë të detyrueshme edhe në ambientet publike. Presidenti Macron e ka përjashtuar kategorikisht mundësinë e një mbyllje tjetër, duke deklaruar se vendi duhet të kundërpërgjigjet me vaksinën.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.