Rriten pagesat online për taksën e automjeteve – Gonxhja: Dominuese mbeten pagesat cash, nxisim qytetarët të mos paraqiten në sportel
Viti 2020 shënoi një rritje të ndjeshme të qytetarëve që zgjodhën të paguajnë online taksën vjetore të automjeteve. Në një prononcim për TV SCAN, kreu i Drejtorisë së Përgjithshme të Shërbimeve të Transportit Rrugor, Blendi Gonxhja thotë se ishin 1130 qytetarë që e paguam këtë taksë online, nga 155 qytetarë që e përzgjodhën këtë shërbim në vitin 2019.
Megjithatë, pagesat online, kundrejt pagesave që kryhen cash përmes paraqitjes në sportel mbeten nën nivelin 1%, ndaj Gonxhja nxit qytetarët që të përzgjedhin shërbimet online, duke theksuar se ato janë tejet komode e të sigurta.
Gonxhja sjell në vëmendje benefitet e përdorimit të shërbimeve online, ku sipas përllogaritjeve të dikasterit që ai drejton për vitin 2020, qytetarët shqiptarë kursyen rreth 2 mln euro karburant, duke mos shkuar në sportel.
Ndërkaq, kreu i DPSHTRR-së thotë se po punohet edhe më tej, në mënyrë që përdorimi i sistemit të bëhet edhe më i lehtë nga qytetarët.
Pagesa e taksës vjetore të automjeteve kryhet përmes sistemit e-albania, duke përzgjedhur shërbimin me të njëjtin emër. Për të kryer pagesën nuk nevojitet asnjë dokument shtesë, përveç një karte debiti apo krediti.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.