Rriten pensionet private – Mbi 25 mijë kontribues në fund të vitit të kaluar

Skemat e pensioneve private po marrin përmasa të konsiderueshme. Viti 2018 ishte një konfirmim i mëtejshëm i kësaj tendence pozitive. Sipas të dhënave nga Autoriteti i Mbikëqyrjes Financiare, numri i kontribuesve në fondet private të pensioneve ka arritur në më shumë se 25 mijë. Gjatë vitit të kaluar, numri i kontribuesve është shtuar me rreth 4300 individë ose 21%.

Rritja e numrit të anëtarëve po udhëhiqet kryesisht nga fondi Credins Pension, që tashmë numëron më shumë se 15 mijë kontribues dhe mban mbi 60% të tregut. Edhe në bashkëpunim me kompaninë mëmë, Credins Bank, ky fond po promovon me sukses rëndësinë e investimit në një pension privat. Rritja e skemave private të pensioneve do të kishte një impact shumë të rëndësishëm social dhe ekonomik në afatin e gjatë. Rritja e këtyre fondeve do të ulte presionin mbi skemën shtetërore të sigurimeve shoqërore.

Megjithatë, incentivat për rritjjen e këtyre fondeve ende janë të pamjaftueshme. Sipas ligjit, këto kontribute përjashtohen nga tatimi mbi të ardhurat personale deri në masën e 15% të të ardhurave vjetore bruto, por jo më shumë se 200 mijë lekë në vit. Autoriteti i Mbikëqyrjes Financiare prej vitesh po kërkon nga qeveria rritjen e incentivave fiskale, por, deri tani, pa sukses.

Në volume, tregu ende ngelet në përmasa modeste, por me rritje të qëndrueshme nga viti në vit. Totali i aktiveve të fondeve të pensioneve në fund të dhjetorit arriti në rreth 2.3 miliardë lekë, në rritje me 32% gjatë vitit 2018.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.