Rriten rastet e fëmijëve që kërkojnë psikolog – Treska: Shkak pandemia COVID-19, por edhe ndërgjegjësimi i prindërve
Situata e krijuar nga pandemia COVID-19 ka rritur ndjeshëm rastet e prindërve që kërkojnë shërbim psikologjik për fëmijët në moshë puberteti dhe adoleshencë. Një një prononcim për TV SCAN, presidentja e Urdhrit të Psikologut Valbona Treska thotë se mesatarisht 4-5 prindër në ditë kërkojnë asistencë për fëmijët e tyre.
Sipas Treskës, pandemia është një nga faktorët kryesorë, por gjithsesi vihet re edhe një ndërgjegjësim i prindërve për të besuar të shërbimi psikologjik dhe efikasiteti i tij për përmirësimin e shëndetit psikologjik të fëmijëve.
Psikologia apelon çdo prind, që të mos neglizhojë asnjë ndryshim të gjendjes emocionale të fëmijës, teksa shton se hallka e parë është psikologu dhe jo psikiatri.
Shmangia e qëndrimit të gjatë në tableta apo rrjete sociale, mbetet këshilla kryesore për fëmijët, të cilët duhet të orientohen drejt aktiviteteve fizike jashtë banesës.
Më herët edhe Unicef ka konfirmuar se ndryshimet si pasojë e pandemisë globale Covid-19, kanë ndikuar realitetin e shumë familjeve dhe fëmijëve. Ndërkohë që, në këtë kuadër , në bashkëpunim me USAID dhe dhe Ministrinë e Shëndetësisë dhe Mbrojtjes Sociale, është ndërmarrë edhe një fushatë mbi informimin e fëmijëve, duke përfshirë element interaktivë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.