Rriten shpenzimet në infrastrukturë – Investimet në rrugë do të shkojnë në 31 mld lekë
Shpenzimet e Ministrisë së Energjisë dhe të Transportit do të rritet në tre vite në vijim, duke shkuar në 55 miliardë lekë nga 47 miliardë që janë aktualisht. Ashtu si edhe në vitet e shkuara vëmendja më e madhe e kësaj Ministrie do të jetë e fokusuar tek transporti rrugor, shpenzimet për të cilin do të shkojnë në 31 miliardë lekë nga 24 që janë aktualisht.
Me programin “Transporti rrugor” do të bëhet kompletimi i akseve rrugore nacionale si: Rruga e Arbrit, Thumanë-Vorë -Kashar, Kashar -Rrogozhinë; Milot- Balldren; Orikum -Dukat; Kardhiq -Delvinë brenda vitit 2021 nëpërmjet partneritetit publik privat në kudër të projektit “1 miliard”.
Përveç kësaj synohet që të bëhet rritja graduale e shpenzimeve aktuale për mirëmbajtje të rrugëve nacionale nga 3 mijë euro në 11 mijë euro në vit për km deri në vitin 2021.
Me investimet që do të bëhen në të gjitha akset e sipërpërmendura synohet që të bëhet ulje e numrit të aksidenteve si dhe të ulet numri i pikave të zeza me 23%.
Në tre vitet në vijim parashikohet që të bëhen edhe ndërhyrje në rrjetin e furnizimit me ujë të pijshëm duke bërë që rreth 99% e popullatës të marrë këtë shërbim nga 78.8% që ka qenë në vitin 2017.
Shpenzimet për ndërhyrjet në rrjetin e ujësjellësit do të rriten duke shkuar në 12.2 miliardë lekë nga 10.6 miliardë lekë që janë aktualisht.
Në ketë kuadër mendohet se mesatarja e orëve të furnizimit me ujë të pijshëm në rang kombëtar do të rritet në 14 orë në ditë më 2021, nga 12.5 orë në ditë në vitin 2018. Ndërkohë që ujësjellësi parashikon që të reduktojë humbjet në nivel kombëtar në masën 20% në vitin 2021.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.