Rriten shpenzimet për shëndetin – Medikamentet ju “shpojnë” xhepat shqiptarëve

Shëndetësia falas  ka mbetur vetëm një premtim , kjo referuar të dhënave të Instat-it, të cilat flasin për një rritje domethënëse të shpenzimeve për shëndetin. Jemi në vitin e pestë të premtimit për shëndetësi falas por  shpenzimet që bëjnë qytetarët nga xhepi duket se janë rritur. Saktësisht, shpenzimet e bëra në grupin “Shëndet” kanë shënuar rritje prej 14,3 %, krahasuar me vitin 2016, rritje e cila ka ardhur si rezultat i rritjes së shpenzimeve për nëngrupin “medikamente”.

Rritje kjo e pajustifikuar nëse do ti referoheshim nismave ligjore të ndërmara dhe premtimeve për shëndetësi falas. Në vitin 2014 në  vendin tone  hyri në fuqi heqja e TVSH-së 10% për medikamentet e cila u reflektua në uljen e çmimit të tyre. Por me sa duket kjo ulje nuk është reflektuar në xhepin e familjeve shqiptare. Referuar të dhënave zyrtare gjatë vitit 2017 janë importuar mbi 22.7 miliardë lekë medikamente .

Nga kjo vlerë financiare e tregut të medikamenteve gjysma janë blerë nga Fondi i Sigurimit të Detyrueshëm të Kujdesit Shëndetësor i cili kishte një fond për rimbursimin në vlerën e 10 miliardë lekëve.  Por pavarësisht se gjysma e medikamenteve janë blerë nga fondi , që nënkupton se pacientëve do t’u jepen me rimbursim, përsëri shpenzimet që kanë bërë vetë pacientët kanë ardhur në rritje. Kjo mund të jetë si rezultat i  kritereve shtrënguese që ka miratuar vetë fondi për rimbursimin e medikamenteve të caktuar e kryesisht të barnave të shtrenjta.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.