Rriten të ardhurat në Janar – Ndikojnë TVSH, akciza dhe kontributet shoqërore
Viti 2018 ka nisur pozitiv, përsa i përket të ardhurave në buxhetin e shtetit, sidomos përsa i përket të Ardhurave nga Tatimi mbi Vlerën e Shtuar, nga akciza dhe nga kontributet e sigurimeve shoqërore.
Për janarin, të ardhurat në buxhet rezultuan në 35 miliardë e 391 milionë lekë, 7.6 për qind më shumë krahasuar me të njëjtën periudhë të vitit 2017.
Të ardhurat nga TVSH dhe akciza, dy taksa që vendosen mbi qarkullimin e mallrave u rritën me 10 për qind krahasuar me vitin e kaluar.
Referuar të dhënave të Ministrisë së Financave, qeveria e ka shfrytëzuar rritjen e të ardhurave për të shpenzuar më shumë.
Në janar shpenzimet totale të buxhetit ishin rreth 30 miliardë lekë, 20 për qind më të larta se janari i vitit 2017.
Ndërkohë, për të gjithë vitin e kaluar, të ardhurat buxhetore rezultuan në një total prej 430,9 miliardë lekësh, në rritje me 5.9 për qind, krahasuar me faktin e 2016, ndërsa plani vjetor nuk u realizua me 2.7 për qind, ose 12 mld lekë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.