Rriten të ardhurat nga TVSH – 5 mujori, 2.5 miliardë lekë më shumë se në vitin 2016

Taksa e tatimit mbi vlerën e shtuar njihet edhe si taksa e konsumit. Por rritja e nivelit të konsumit duket se ka dhënë  dhe efektin pozitiv në të ardhurat nga TVSH-ja. Sipas statistikave  të Ministrisë së Financave, të ardhurat nga TVSH-ja janë për 5 muajt e parë të vitit janë realizuar në vlerën  53.7 miliardë lekë, ndërkohë që janë 2.5 miliardë lekë më shumë se një vit më parë.

Kështu në të njëjtën periudhë të një viti më parë  mbledhja e të ardhurave nga kjo taksë  rezultonte në vlerën e 51.3 miliardë lekëve.  Një ndër faktorët që mund të ketë ndikuar në të ardhurat e  këtij zëri  mund të jetë  ndërgjegjësimi i biznesit  dhe formalizimi i transaksioneve.

Kjo pas një aksioni që nisi qeveria për luftën ndaj informalitetin, ku te kjo taksë u vërtetua se ishte dhe niveli  më i lartë i evazionit.  Por duke analizuar këto të ardhura për këtë zë në treguesit fiskalë vërehet se  kemi një shifër më të lartë  edhe në rimbursimin e  TVSH ndaj bizneseve.

Vetëm për periudhën 5 mujore, administrata fiskale ka rimbursuar TVSH e kthyeshme në  vlerën 4.8 miliardë lekë, nga 3 miliardë  lekë që ishte rimbursimi  në të njëjtën periudhë të një viti më parë.

Referuar këtyre treguesve  mund të analizojnë se edhe pse në një vit elektoral, eficenca e administratës fiskale nuk ka rënë, përkundrazi janë rritur të ardhurat në arkën e shtetit.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.