Rriten tensionet mes Kosovës dhe Serbisë- Arrestohen 19 persona si pjesë e një misioni anti-kontrabandë
Tensionet u rritën midis Kosovës dhe Serbisë, pasi policia në Kosovë ka arrestuar disa serbë si pjesë e një misioni anti-kontrabandë në rajonin verior të vendit. Veprimi nxiti një përgjigje të shpejtë nga Serbia, e cila nuk e njeh ende Kosovën si një shtet.
Presidenti serb, Aleksandar Vuçiç, tha se ushtria e Serbisë ishte e gatshme të mbrojë serbët në Kosovë. Komunat veriore në Kosovë janë të populluara kryesisht nga serbët që mbështesin Beogradin mbi Prishtinën. Kryeministri i Kosovës, nga ana tjetër, këmbënguli që ajo ishte vetëm një operacion policor.
“Unë konfirmoj se operacioni ka të bëjë me zbatimin e ligjit dhe asgjë tjetër. I bëj thirrje serbëve në veri që të qëndrojnë të qetë dhe të respektojnë ligjin,” tha Kryeministri i Kosovës Ramush Haradinaj.
Nga ky operacion u arrestuan të paktën 19 persona, ndër ta dhe dy zyrtarë të OKB.
“Misioni i OKB-së në Kosovë tha se është i shqetësuar nga zhvillimet në veri të Kosovës sot, duke përfshirë arrestimin e dy anëtarëve të stafit të OKB-së, të cilët po kryenin detyrat e tyre nga policia e Kosovës,” tha Farhan Haq, zëvendës zëdhënës i Sekretarit të Përgjithshëm të OKB. Haq tha se të dy anëtarët e stafit të OKB-së u transferuan në një spital për trajtimin e lëndimeve të tyre.
Kontrabanda ndërkufitare është rritur në komunat veriore me shumicë serbe. Kosova zbatoi një tarifë prej 100 përqind për mallrat nga Serbia vitin e kaluar. Në lidhje me këtë çështje, ka reaguar dhe ministri i jashtëm i Kosovës Behgjet Pacolli tha se ky nuk do të ishte operacioni i fundit policor në Kosovë..
“Ne po luftojmë kundër krimit të organizuar,” tha Pacolli.
Elefteria Zguri/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.