Rritet bindshëm çmimi i aluminit – Prek $2,403 për ton prej sanksioneve amerikane ndaj prodhuesit rus të metalit

Çmimi i aluminit është rritur në nivelin më të lartë në 6 vite në nisje të kësaj jave, duke zgjatur fuqizimin e kohëve të fundit që erdhi prej sanksioneve amerikane ndaj gjigantit rus të aluminit, Rusal.

Metali tregtohej në 2,403 dollarë për ton në bursën e Londrës.  Më datë 6 Prill, Shtetet e Bashkuara vendosën sanksione ndaj disa firmave, agjencive dhe oligarkëve rusë, përfshirë Rusal.

Sanksionet ngrijnë të gjithë asetet ruse që janë nën juridiksionin e Shteteve të Bashkuara. Rusal, që pësoi rënie gjigante në vlerë tregu ditën e Hënë, është një nga prodhuesit më të mëdhenj të aluminit në botë.  Kolapsi i kompanisë mund të heqë një pjesë të madhe të ofertës së aluminit nga tregu.

Sipas analistëve, ndër faktorët kryesorë që kanë sjellë rritjen e çmimit janë sanksionet kundër Rusal, që do të sjellin tkurrjen e ofertës në treg si dhe zhvlerësimi i dollarit amerikan.  Rritja e aluminit në vlerë tregu vjen një muaj pas vendosjes së tarifave prej 10% në importet e metalit nga Donald Trump.

Trump ka thënë se tarifat nuk kanë treguar efekte negative ndaj ekonomisë amerikane.  “Pavarësisht tarifave mbi aluminin, çmimi i metalit ka rënë me 4%”, shkroi Trump në Twitter më datë 6 Prill.

Megjithatë, çmimet janë rritur bindshëm me më shumë se 20% që kur SHBA vendosi sanksione kundër Rusisë.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.