Rritet borxhi publik – Ministria e Financave: 66% e PBB-së, 1% më shumë se 3-mujori i dytë
Borxhi publik arriti në 66% të Prodhimit të brendshëm Bruto për 9-mujorin e këtij viti, duke u rritur me rreth 1 pikë përqindje në raport me 3 –mujorin e dytë, ku u raportua të ishte në nivelin e 65.1%. Sipas Ministrisë së Financave dhe Ekonomisë, për periudhën janar-shtator stoku total i borxhit vlerësohet në nivelin e 1,089 miliard lekë, duke u rritur me rreth 1.3 miliard lekë në raport me periudhën prill-qershor.
Niveli i borxhit të brendshëm dhe atij të jashtëm në raport me totalin e borxhit të qeverisjes qendrore janë përkatësisht rreth 54% dhe 46%, duke ruajtur pothuajse të njëjtat raporte me fundin e vitit të kaluar. Peshën më të madhe në stokun e borxhit të qeverisjes qendrore vazhdojnë ta mbajnë instrumentet e tregtueshme, ku përfshihen bonot e thesarit, obligacionet dhe eurobondi si dhe huatë e huaja me destinacion financimin e projekteve. Sistemi bankar vijon të jetë mbajtësi më i madh i borxhit të brendshëm, me 61.19% të totalit, duke u ndjekur nga individët me 15.15% t totalit.
Ndërkohë që, për sa i përket portofolit të borxhit të jashtëm, peshën më të madhe vazhdon ta mbajë borxhi me terma koncesionale, duke mundësuar optimizimin e kostove dhe diversifikimin e burimeve të financimit.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.