Rritet ekonomia ruse – Me 2.5% në T2, falë ndërtimit dhe industrisë
Ekonomia ruse u rrit me një normë prej 2.5% gjatë tremujorit të dytë të vitit, në krahasim me të njëjtën periudhë të një viti më parë, tregojnë të dhënat e fundit nga zyra e statistikave në vend. Kjo rezulton të jetë performanca më e mirë që prej vitit 2012.
Ekonomia ruse, në varësi të theksuar nga eksportet e naftës dhe gazit, u rrit me 0.5% në tre muajt e parë të këtij viti, dhe periudha Prill-Qershor shënon tremujorin e tretë me radhë në rritje.
Kjo periudhë kohore përkon edhe me stabilizimin e çmimeve të naftës në tregjet ndërkombëtare.
Ekspertët argumentojnë se, ekonomia ruse gjatë tremujorit të dytë regjistroi një rritje me bazë të gjerë, pra në thuajse të gjithë sektorët kryesorë.
Shtysa më e madhe vjen nga sektori i ndërtimit dhe ai industrial, paçka se kontribut të ndjeshëm pozitiv ka dhënë edhe tregtia me pakicë.
Bujqësia është i vetmi sektor në kontraktim gjatë tremujorit të dytë të vitit, thonë të dhënat më të fundit. Pavarësisht rritjes, shifra e tremujorit të dytë në tërësi rezulton nën objektivin e Ministrisë së Ekonomisë, që projektonte një rritje pranë 2.7% në këtë tremujor.
Gjatë vitit të kaluar, ekonomia ruse iu rikthye rritjes, pas plot 7 tremujorësh me radhë në tkurrje.
Përgjatë të gjithë vitit aktual, qeveria projekton një rritje ekonomike në 2%, ndërkohë që banka qendrore e vendit projekton 1.8% rritje.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.