Rritet huadhënia në Eurozonë – Niveli më i lartë që prej vitit 2009, falë kredive për shtëpi
Rritja e huadhënies bankare ndaj familjarëve në Eurozonë arriti në nivelin e post-krizës financiare gjatë Majit.
Nga ana tjetër, indikatori M3 që mat qarkullimin e parasë në sistem e që është ndër indikatorët më të qartë të ecurisë së ekonomisë, u rrit gjithashtu gjatë muajit, tregojnë të dhënat më të fundit të Bankës Qendrore Europiane.
Gjatë majit, kreditë ndaj familjarëve u rritën me 2.6% në zonën e monedhës së përbashkët, duke prekur nivelin më të lartë që prej Marsit të vitit 2009. Të dhënat rezultojnë mbi nivelin e muajit Prill dhe mbi parashikimet e tregjeve dhe analistëve. Rritja udhëhiqet nga kreditë për shtëpi.
Të dhënat sinjalizojnë se, paratë që Banka Qendrore Europiane po injekton në sistem, me një hap prej 60 miliardë euro në muaj, po e gjejnë rrugën drejt ekonomisë reale, duke shkuar deri të familjarët.
Edhe huadhënia ndaj korporatave u rrit ndjeshëm gjatë muajit, në 2.4%, në nivele të pandryshuara në krahasim me muajin paraardhës. Indikatori M3 ndërkohë u rrit në 5 pikë, nga 4.9 që ishte gjatë Prillit.
Më parë, ky indikator ka parashikuar me saktësi thuajse matematike performancën ekonomike të rajonit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.