Rritet importi i cigareve – 6-mujori, hidhen në treg 55 ton më shumë se 2016
Sasia e duhanit që Shqipëria prodhon nuk i plotëson nevojat e tregut të brendshëm duke bërë që importi të mbulojë pjesën më të madhe të konsumit vendas.
Sipas statistikave zyrtare nga Drejtoria e Përgjithshme e Doganave, vetëm për 6 muajt e parë të këtij viti sasia e duhanit e importuar dhe hedhur në treg për konsum rezulton të jetë 55 ton më shumë se e njëjta periudhë e një viti më parë.
Por referuar të dhënave nga doganat, këto shifra rezultojnë vetëm për cigaret dhe jo për gjithë produktin e duhanit. Kështu sipas të dhënave nga doganat, për 6 mujorin e parë të këtij viti janë importuar 1 408 ton cigare, ndërkohë që për të njëjtën periudhë të një viti më parë niveli i importit të këtij produkti ishte 1 353 ton.
Megjithëse është rritur importi, nuk ka një analizë apo një përcaktim të saktë se sa është sasia e konsumuar, pasi nuk ka një vlerësim apo matje të këtij produkti se sa është prodhim vendas.
Por edhe pse Shqipëria konsiderohet një vend me potencial të lartë të prodhimit të këtij produkti, tregu vijon të dominohet bindshëm nga importuesit.
Megjithatë vitet e fundit në vendin tonë po vihet re një tendencë për “rigjallërimin” e prodhimit vendas dhe konsumit të duhanit të hapur siç njihet në gjuhën e përditshme. Por informaliteti i lartë që dominon sektorin bujqësisë, nuk lë jashtë edhe duhanin.
Kështu nuk ka një statistike të saktë se sa është prodhimi vendas, dhe debate të shumta ka për importin, pasi kontrabanda e cigareve “ka lulëzuar” për shumë kohë.
Violeta Shqalsi/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.