Rritet inflacioni në Spanjë, 3% për muajin Shkurt
Niveli i çmimeve në Spanjë ka kaluar pritshmëritë e Bankës Qendrore Europiane për stabilitetin e çmimeve. Duke përdorur metodën e harmonizuar të çmimeve të konsumit, indeksi u rrit në 3% për muajin Shkurt me bazë vjetore, tregojnë të dhënat fillestare të zyrës së Statistikave.
Pas rënies së inflacionit në tre vitet e fundit ndërkohë që Spanja po rimëkëmbej nga recesioni, ekonomia e katërt më e madhe e rajonit po regjistron tashmë normën më të lartë të çmimeve që e tejkalon objektivin e Bankës Qendrore Europiane në afër 2%.
Ndërsa të dhënat paraprake nuk përfshinë detaje, ekonomistët thonë se rritja e fundit ka ardhur prej çmimeve më të larta të naftës dhe faturave të energjisë në një kohë të motit të keq.
Ministri i Energjisë i Spanjës, Alvaro Nadal, tha muajin e kaluar se konsumatorët duhet të përshtaten me një energji më të shtrenjtë, duke shtuar se faturat mund të rriten me rreth 100 euro këtë vit.
Ministri i Ekonomisë, Luis De Guindos deklaroi se kjo rritje e nivelit të çmimeve është e përkohshme dhe se inflacioni do të bjerë poshtë 2%-shit në tremujorin e dytë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.