Rritet interesi i biznesit të huaj – Mbi 1 mijë sipërmarrje regjistrohen në 7 muaj

Përmirësimi i klimës së biznesit, kryesisht në lehtësimin e procedurave, duket se ka rritur interesin e sipërmarrësve të huaj për Shqipërinë. Në shumë anketa të dhomave të huaja të biznesit që zhvillojnë aktivitetin ekonomik në vendin tonë, janë theksuar jo vetëm problematikat, por edhe lehtësitë e mundësitë që kanë këto sipërmarrje për të hyrë ne tregun shqiptar apo për të zgjeruar prezencën e tyre.

Kështu referuar të dhënave zyrtare nga Qendra Kombëtare e Biznesit vihet  re se ka një rritje prej 5.56 % të numrit të bizneseve të huaja që janë regjistruar për periudhën 7 mujore, në krahasim me një vit më parë. Sipas këtyre statistikave, numri i sipërmarrjeve me pronësi 100% të huaja, apo të përbashkëta në këtë periudhë arrin në 1007 regjistrime të reja, ndërkohë që një vit më parë ishin 954.

Por duke krahasuar të dhënat e Qendrës Kombëtare të Regjistrimit, mbyllja e aktiviteteve nga ana e sipërmarrësve të huaj ka rënë gjatë këtij viti me 26.14 %, ose më konkretisht, nga 88 biznese që janë çregjistruar  në 7 mujorin e vitit të kaluar, për të njëjtën periudhë të këtij viti, numri i çregjistrimeve pranë kësaj qendre është 65.

Tashmë prej vitesh qeveria shqiptare e ka vënë prioritet kryesor thithjen e investimeve të huaja, ku përveç thjeshtimit të procedurave, ka miratuar një sërë ndryshimesh ligjore, të cilat “ua bëjnë  më të lehtë” investimin në Shqipëri. Megjithatë konkurrenca nga vendet e rajonit në këtë pikë vazhdon të jetë e madhe.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.