Rritet kredia në lekë, bie në euro – Vazhdojnë rezultatet pozitive të politikë së de-euroizimit nga BSH

Rezultatet e kreditimit për muajin Maj kanë ritheksuar tendencën e shqiptarëve për të bashkërenduar monedhën e të ardhurave të tyre me atë me të cilën marrin kredi. Rezultatet e Bankës së Shqipërisë tregojnë për një avancim të politikës së de euroizimit ku vërehet rritje e kredisë në lekë dhe rënien e kredisë në valutë.

Kredia në lekë gjatë muajit Maj është rritur me pothuajse 4 miliardë lekë ndërkohë që kredia në valutë, pavarësisht se me vlera minimale, ka pësuar rënie. Statistikat e Bankës së Shqipërisë ritheksojnë tendencën drejt “kombëtarizimit” të kredisë konsumatore dhe asaj të biznesit. Shifrat tregojnë se në totalin e saj, kredia gjatë muajit të pestë të vitit 2021, është rritur me afërsisht 3 miliardë lekë ku pesha e këtij efekti i takon kredisë në lekë. Në anën tjetër, ashtu si parashikohet nga Banka e Shqipërisë, huaja në lekë tashmë është më e preferuar për shqiptarët se sa ajo në valutë, një prirje normale kjo duke konsideruar faktin se të ardhurat dominojnë në monedhën kombëtare.

Lidhur me kredinë në valutë, rënia krahasuar me prillin është minimale por mund të përdoret si tregues i drejtpërdrejt i politikës së de-euroizmit të ndjekur nga Banka e Shqipërisë.

Tendenca shqiptare vjen në harmoni me tendecën globale dhe më vecanërisht atë europiane për ët kërkuar kapital në institucionet financiare tek sa ekonomia e planetit ka rifilluar të funksionojë pothuajse në kapacitet të plotë.

Sigurisht që rritja e kredisë në Shqipëri është e lidhur dhe me normat e ulta të interesit të cilat e kanë zanafillën në politikën monetare të BSH sipas së cilës jemi në minimumin historik të normës bazë të interesit. I pyetur lidhur me këtë politikë, guvernatori Sejko është shprehet kështu:

“ Kjo normë interesi që ne kemi vazhdon të jetë stimuluese edhe kjo normë interesi është mjaftueshmërisht stimuluese për ekonominë shqiptare, dhe kjo është reflektuar, transmetimi i politikës sonë monetare është reflektuar në tregjet financiare si ne normat e interesin në të treja segmentet e tregut financiar, në bono thesari, në kredi dhe depozita. Ne kemi normat më të ulta që kanë qenë të interesit, por edhe në aspektin e kreditimit kemi vënë re qe kredia në lek është rritur konsiderueshëm ne raport me kredinë në valutë, që dhe kjo është pasojë e politikës monetare të ndjekur nga ne”.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.