Rritet lehtë inflacioni në korrik – Grupet “Transport” dhe “Ushqime e pije joalkoolike”, çmimet më të larta në një vit
Inflacioni ka pësuar një rritje të lehtë në muajin korrik krahasuar me muajin paraardhës. Ndërkohë, që rritja është më e ndjeshme krahasuar me të njëjtin muaj të një viti më parë. Të dhënat më të fundit nga INSTAT tregojnë se, ndryshimi vjetor i indeksit të çmimeve të konsumit në muajin korrik 2021 është 2,2 %, ndërsa një vit më parë ky ndryshim ishte 1,4 %. Ndryshimi mujor i indeksit të çmimeve të konsumit në muajin korrik krahasuar me qershor është 0,1 %.
Shifrat e mësipërme tregojnë për një ringritje graduale të ekonomisë, lidhur me përmirësimin e konsumit. Stina e verës me prurje të konsiderueshme të turisteve, si vendas, ashtu edhe të huaj ka ndikuar në rritjen e çmimeve në disa grupe si transporti me 4,4%, ushqimet dhe pijet joalkoolike me 4,1%, hotelet dhe restorantet me 1,4%. Gjithashtu, në grupin e ushqimeve rritja më e madhe është regjistruar tek zarzavatet me 16,6%, vajra dhe yndyrnat me 7%, si dhe tek frutat me 2,9%. Nga ana tjetër çmimet e grupit “Argëtim dhe kulturë” u ulën me 1,2%, pasuar nga grupi “Mallra dhe shërbime të ndryshme” me 0,1 %.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.