Rritet me 38% volumi i mallrave të shkarkuara gjatë muajit Janar

Volumi i mallrave të ngarkuara dhe shkarkuara në porte në muajin Janar të këtij viti ka shënuar një rritje me 38.4% krahasuar me atë të vitit 2017, duke arritur në 302 mijë ton. Ndërkohë, pjesa më e madhe e tyre, 92.7% është kryer përmes Portit të Durrësit.

Sipas të dhënave të Institutit të Statistikave, mallrat e transportuara me hekurudhë kanë shënuar një rritje me 13.8% krahasuar me po të njëjtën periudhë të një viti më parë dhe rezultojnë 761 mijë ton-kilometër.

Sipas INSTAT, rritje me 15.9% ka shënuar edhe transporti i mallrave me ajër në 192 ton, krahasuar me janarin e vitit 2017.

Sa i takon vlerës së mallrave të eksportuara dhe të importuara, rezulton se gjatë muajit janar 2018 kanë kapur një vlerë prej 68 miliardë lekë.

Lidhur me mallrat e eksportuara, gjatë kësaj periudhe kryeson ai përmes detit me 64.3%, ndjekur nga ai me rrugë me 32.7% dhe përmes ajrit me 0.5%.

Sipas INSTAT, mallrat e eksportuara me rrugë dhe det kanë shënuar një rritje respektivisht 48.9% dhe 11.9% në krahasim me janarin e vitit 2017.

Ndërkohë, edhe importi i mallrave është kryer në pjesën më të madhe përmes transportit detar me 49.2% , 39.5% me rrugë dhe vetëm 3% përmes ajrit.

Gjatë kësaj periudhe ka shënuar një rritje me 26.1% importi i mallrave me hekurudhë si dhe ai me rrugë me 22.3%, në krahasim me janarin e vitit të kaluar.

Genta Dobra/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.