Rritet ndërgjegjësimi “në timon”, Instat: 15% më pak aksidente rrugore në shkurt 2020

Muaji Shkurt ka rezultuar me ulje të aksidenteve rrugore në të gjithë Shqipërinë, me 15.2%, krahasuar me shkurtin e vitit 2019.

Sipas publikimit më të fundit të Institutit të Statistikave, në muajin e dytë të 2020-ës, numri total i aksidenteve rrugore ishte 106, në një kohë që në shkurt 2019, ky numër ishte 125. Nga ana tjetër, ky “ndërgjegjësim” është ndjerë në fakt për të 2 muajt e parë të 2020.

Referuar INSTAT, në periudhën janar – shkurt 2020 ka pasur 199 aksidente, në një kohë që në të njëjtën periudhë të vitit paraardhës, kjo shifër ishte 229. Për këtë periudhë 2 mujore, rënia ka qenë me 13.1%.

Mirëpo, për fatin e keq, këto aksidente të ndodhura në janar-shkurt 2020, edhe pse më të pakta në numër, rezultojnë të kenë qenë më fatale, nga ato të periudhës së parë 2 mujore të vitit 2019.

Sipas të dhënave të INSTAT, në këto 2 muaj ka pasur 5 të vdekur më shumë, nga periudha janar- shkurt 2019. Nga ana tjetër, numri i të plagosurve është reduktuar në 237 (janar-shkurt 2020), nga 283, në janar-shkurt 2019.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.