Rritet papunësia në Kanada – Ngjitet në 6%, por edhe punësimi rritet ndjeshëm
Ekonomia kanadeze krijoi më shumë vende pune se pritshmëritë gjatë muajit Qershor të këtij viti, duke i dhënë kështu më shumë zë pritshëmrive për një rritje të normave të interesit gjatë takimit të kësaj jave.
Ndërhyrja do të ishte e katërta për këtë vit. Performanca mjaft e mirë ekonomike e ekonomisë kanadeze ka bërë që ndërhyrjet e bankës qendrore në kahun shtrëngues të politikave monetare të jenë të vazhdueshme.
Zyra e statistikave në vend njoftoi së fundmi se, gjatë Qershorit janë shtuar 31800 vende të reja pune, pjesa dërrmuese e të cilave part-time. Por, kjo nuk ka ndihmuar në uljen e normës së papunësisë, përkundrazi.
Norma është ngjitur në 6%, nga 5.8% që ishte më parë, si pasojë e faktit që më shumë njerëz i janë shtuar tregut të punës.
Pritshëmritë e tregjeve dhe analistëve ndërkohë për krijimin e vendeve të punës ishin më të ulta se rezultati. Pagat mesatare në orë u rritën gjithashtu me 3.5% gjatë muajit. Ky indikator është mjaft i rëndësishëm për vendimin e Bankës Qendrore.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.