Rritet presioni mbi Brukselin për të ndihmuar në reduktimin e ‘fluturimeve fantazmë’ në Europë!

Presioni mbi Komisionin Europian po rritet për të lehtësuar rregullat që kërkojnë që avionët bosh “fantazmë” të fluturojnë në mënyrë që të ruajnë vendet e tyre të ngritjes dhe uljes në aeroporte. Aktualisht, linjave ajrore u kërkohet të përdorin 50% të vendeve të tyre për t’u siguruar që t’i mbajnë ato, por me rënien e prenotimeve për shkak të ardhjes së variantit Omicron, bizneset po bëjnë thirrje për fleksibilitet nga Brukseli këtë dimër.

Lufthansa tashmë ka paralajmëruar se 18,000 fluturime, ose 5-6% e të gjitha linjave të tyre këtë dimër, do të jenë fluturime “të panevojshme”, në thelb me shumë pak pasagjerë për të qenë fitimprurës. Kompania ka njoftuar tashmë tërheqjen e 33,000 fluturimeve në javët dhe muajt e ardhshëm, por thotë se nuk mund të shkurtojë më tej.

Në ditët para pandemisë, linjat ajrore ishin të detyruara të kryenin 80% të fluturimeve të tyre për t’i mbajtur ato vitin e ardhshëm. Por sapo filloi viti 2020 prej Covid-19, Komisioni Evropian e pezulloi këtë rregull për shkak të kolapsit të trafikut ajror. Norma prej 50% u prezantua në shkurt të vitit të kaluar.

Megjithatë, tani Brukseli është nën presion edhe një herë për të ulur më tej përqindjen për linjat ajrore. Ekzekutivi i BE-së po përballet gjithashtu me presion nga shtetet anëtare. Ministri belg i Lëvizshmërisë, Georges Gilkinet, i shkroi Komisioneres Evropiane për Transportin, Adina Vălean, në fillim të kësaj jave për të kërkuar uljen e tarifës.

Sipas një diplomati belg, Gilkinet kërkon që norma të ulet nga 50% në 30%. Deri më tani, Komisioni po i reziston presionit, duke thënë se nuk do të lehtësojë rregullat. Në dhjetor të vitit të kaluar, Brukseli njoftoi se nga 28 marsi do të rrisë normën për periudhën e verës në 64%, bazuar në pritshmërinë që kërkesa të rritet.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.