Rritet sigurimi i jetës – SICRED, ecuri pozitive në 2019-ën. 12 produkte për qytetarët

Kompania e sigurimit të jetës dhe shëndetit, SICRED, ka lënë pas një vit pozitiv sa i takon aktivitetit të saj ku primet e shkruara bruto arritën në vlerën e 289 milionë lekëve dhe  dëmet e paguara në 47 milionë lekë. Referuar të dhënave zyrtare të bëra publike në raportin vjetor 2019 të shoqërisë SICRED sh.a,  viti që lam pas ka rezultuar kryesisht poztiv për produktet afatgjata të sigurimit të jetës me elementë kursimi, ku  Sigurimi Jetë me Mbijetesë, një produkt sigurimi jete me Shumë të Garantuar për jetë dhe mbijetesë, shënoi një rritje prej 50%.

Gjatë vitit 2019, Shoqëria SICRED kishte 12 produkte të licensuara pranë Autoritetit të Mbikqyrjes Financiare, ku peshën më të madhe të primeve të shkruara bruto sipas produkteve kryesore e zë sigurimi i jetës për hua me afro 46.11 për qind, e ndjekur nga Sigurimi i jetës dhe shëndetit (Cash plan) me rreth 20 për qind të totalit,  po ashtu sigurimi i jetës dhe aksidenteve në grup ka zënë një peshë të konsiderueshme me rreth 17.56 për qind.

Nërkaq,  gjatë vitit që lam pas, Shoqëria SiCRED sh.a., në kërkim të rinovimit, përmirësimit të shërbimit ndaj klientëve dhe ofrimit të risive, rishikoi strategjinë e saj, duke shitur 12% të kuotave të saj aksionare të zotëruara në Shoqërinë e Administrimit të Fondeve të Pensionit dhe Sipërmarrjeve të Investimeve Kolektive CREDINS Invest sh.a.  Ky vendim vjen si rezultat i synimit të SiCRED për të rritur përqendrimin dhe fokusin në aktivitetin e sigurimit të jetës, për të sjellë për klientët produkte të reja sigurimi, të cilat do të përbëjnë risi për tregun shqiptar të sigurimit. Aktualisht SiCRED sh.a. zotëron 12% të kuotave aksionare të Shoqërisë CREDINS Invest sh.a.

Elisabeta Dosku / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.