Rritet tatimi për të dypunësuarit! Preken 24 mijë persona, Ibrahimaj: Kanë bërë shmangie fiskale
Individët e dypunësuar, do të kenë si detyrim deklarimin e të ardhurave, edhe nëse ato janë nën pragun 2 milionë lekë dhe do tatohen më shumë sesa aktualisht, pasi detyrimi do të llogaritet mbi një pagë të vetme për vitin pasardhës. Drejtoresha e Tatimeve, Delina Ibrahimaj, ka shjeguar se kjo iniciativë do të prekë rreth 24 mijë të punësuar, të cilët deri më tani kanë bërë shmangie fiskale.
Sipas saj, ky projektligj nuk sjell efekte në rritjen e të ardhurave, por ndërmerret në kuadër të formalizimit. Projektligji është pjesë e paketës fiskale 2020, e cila po diskutohet në komisionet parlamentare dhe hyn në fuqi më 1 Janar 2020.
Deklarata e plotë e drejtueses së Tatimeve:
Sipas Udhëzimit aktual të tatimit mbi të ardhurat personale, individët që janë të punësuar në dy apo më shumë punëdhënës, paguajnë tatim mbi pagat për secilën pagë në veçanti, e cila mbahet në burim nga punëdhënësi.
Kjo skemë llogaritje e tatimit mbi pagat është e ndryshme nga ajo e llogaritjes se kontributit të sigurimeve shoqërore, sipas të cilës detyrimi për kontributet llogaritet për totalin e pagave të përfituara nga individi.
Mënyra aktuale e llogaritjes së detyrimit për tatimin mbi pagat për individët e dy apo tre punësuar, jo vetem është burim shmangie fiskale, por është edhe e padrejtë pasi krijon kushte jo të barabarta midis individëve.
Kështu një individ që merr një pagë të vetme prej 58 mijë lekë në muaj tek një punëdhënës paguan 3640 lekë tatim mbi pagën (28000×13%), ndërsa një individ që merr dy paga nga 29 mijë në muaj tek dy punëdhenës të ndryshëm paguan zero lekë tatim mbi pagat.
Nga ana tjetër në rastet e dy apo më shumë punësimeve individët i shmangen formulës së llogaritjes progresive të tatimit mbi pagat, duke zbritur shumën 30 mijë lekë si të patatueshme tek të gjitha pagat që përfitojnë nga punëdhënës të ndryshëm.
Po ashtu, një individ që merr një pagë të vetme prej 260 mijë lekë në muaj tek një punëdhënës paguan 42900 lekë tatim mbi pagën, ndërsa individi që merr dy paga nga 130 mijë lekë në muaj tek dy punëdhënës të ndryshëm paguan vetëm 26 mijë lekë tatim mbi pagat (41 % më pak tatim).
Nga verifikimet e bëra në sistem rezulton se aktualisht janë rreth 24 mijë individë që janë të dy apo trepunësuar në punëdhënës të ndryshëm. Këto individë janë të profesioneve të cilët realisht mirëpaguhen në tregun e punës, si inxhinier, arkitektë, ekonomistë, mësues, pedagogë, konsulente, kuzhinierë. Në shumë raste ata janë individë të cilët kanë pozicione drejtuese në kompanitë ku janë të punësuar, si drejtorë ekzekutivë, drejtorë shitjesh, administratorë të kompanive, etj.
Propozimi për ndryshimin e mësipërm është diskutuar disa herë edhe me Drejtorinë e Politikave Tatimore dhe vjen si një propozim i mirëmenduar, i cili tashme është në proces diskutimi në Kuvend.
Ndërkohë DPT po shqyrton mundësinë e thjeshtimit të plotësimit të deklaratës së tatimit mbi të ardhurat personale për individët që janë të dy apo tre punësuar në punëdhënës të ndryshëm.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.