Rritja e çmimit të ujit – PD, Kraja: Aferë korruptive, s’përmirëson furnizimin
Një ditë pas publikimit të vendimit për rritjen e çmimit të ujit në kryeqytet, ka reaguar këshilltari i djathtë i Këshillit Bashkiak, Akil Kraja. Sipas tij, rritja me 40 % e tarifës nuk do të përmirësojë furnizimin me ujë, por i shërben aferës korruptive për privatizimin e Ujësjellësit të Tiranës.
Me vendimin për rritjen e çmimit të ujit me 40%, Bashkia e Tiranës po u merr edhe më shumë para familjeve dhe bizneseve të kryeqytetit pa u dhënë një shërbim më të mirë. Nëse një familje paguan mesatarisht 10 mijë lekë në muaj vetëm për ujin, tani do të paguajë, 14 mijë lekë. Nëse një biznes paguan mesatarisht 50 mijë lekë në muaj vetëm për ujin, tani do të paguajë 70 mijë lekë. Rritja me 40 % e çmimit të ujit nga Bashkia e Tiranës është e pajustifikuar dhe të gjitha të dhënat tregojnë se është një rritje për një aferë të madhe korruptive, privatizimin e Ujësjellësit të Tiranës. Aktualisht, Ujësjellësi i Tiranës faturon vetëm 1 në 3 litra që prodhon, por për shkak të mungesës së investimeve, rezulton me fitim vjetor 5 milion Euro”.
Sipas vendimit të Entit Rregullator të Ujit, tarifa e ujit për abonentët familjarë do të rritet me 20 lekë/m3, duke e çuar në 65 lekë/m3.Gjithashtu, edhe tarifa fikse u rrit në 200 lekë në muaj, nga 100 lekë që është aktualisht. Tarifat e reja do të hyjnë në fuqi nga data 1 janar 2018.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.