Rritja e dëmeve – Sigurimet paguajnë 71% më shumë gjatë 4-mujorit
Dëmet e paguara nga sigurimet po rriten me ritme të larta gjatë fillimit të këtij viti. Sipas të dhënave nga Autoriteti i Mbikëqyrjes Financiare, për katërmujori, dëmet janë rritur me 71% ndaj të njëjtës periudhë të një viti më parë.
Gjatë prillit, rritja e dëmeve është ngadalësuar disi, po të llogarisim se për tremujorin rritje kishte qenë në masën 83%. Rritja e lartë e dëmeve lidhet me klasat e sigurimit të detyrueshëm motorrik, por, edhe me një nivel të lartë dëmesh të klasën e sigurimit ndaj dëmtimeve në pronë.
Dëmet janë rritur jo vetëm në vlerë, por edhe në numër rastesh, me afro 61% krahasuar me tremujorin e vitit të kaluar. Rritja e dëmeve të paguara lidhet sidomos me shlyerjen e detyrimeve nga vitet e mëparshme.
Pas këmbënguljes së gjatë nga Autoriteti i Mbikëqyrjes Financiare dhe një vendimi që kërkonte pagesën e dëmeve të vjetra që i takojnë Fondit të Kompensimit të Byrosë Shqiptare të Sigurimeve, kompanitë kanë shlyer një pjesë të madhe të këtyre detyrimeve në pjesën e parë të vitit.
Rritja e dëmeve në këtë fillim viti ka sjellë edhe një raport mjaft të lartë mes dëmeve dhe primeve, në afro 40%, nivel ky krejt i pazakontë për tregun shqiptar të sigurimeve. Për sa i takon primeve, tregu i sigurimeve ngelet në rritje, por me një ritëm të ngadalësuar gjatë muajit prill.
Vlera e primeve të sigurimit u rrit me13.9%, nga 17.6% që kishte qenë rritja gjatë tremujorit. Sigurimet e detyrueshme motorrike dominojnë strukturën e primeve, me afro 63% të totalit.
Një rritje të lartë në katër muajt e parë ka regjistruar edhe klasa më e rëndësishme e sigurimit vullnetar, ajo e sigurimit kundër zjarrit dhe forcave të natyrës. Primet në këtë kategori janë dyfishuar krahasuar me të njëjtën periudhë të një viti më parë.
Besohet se kjo rritje lidhet me sigurimin e projekteve të mëdha të investimeve të huaja. Për katërmujorin, tregu i sigurimit të jetës regjistroi një rritje ndjeshëm më të lartë se mesatarja e tregut, duke arkëtuar prime në vlerë 28% më të lartë krahasuar me një vit më parë.
Megjithatë, pesha e jetës në tregun e sigurimeve ngelet relativisht e ulët, me rreth 7.3% të primeve totale.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.