Rritja e huamarrjes – Tregu financiar po i përgjigjet mirë kërkesës për borxh të qeverisë
Tregu financiar po i përgjigjet mirë kërkesës së qeverisë për financim edhe në ankandet e para të muajit maj. Këtë javë qeveria realizoi me sukses ankandin e emetimit të bonove 12 mujore, për një shumë prej 10.7 miliardë lekësh, ndërkohë që kërkesat në ankand arritën shumën e 13.5 miliardë lekëve. Yield-i mesatar ponderuar u rrit lehtë në 2.25%, nga 2.16% që kishte qenë në ankandin e mëparshëm.
Në fund të muajit mars, Banka e Shqipërisë uli normën bazë të interesit në minimumin e ri historik prej 0.5%, ndërsa mori përsipër furnizimin e pakufizuar të likuiditetit për të mbuluar nevojat afatshkurtra të bankave. Pavarësisht nga kjo, normat e interesit në tregun e borxhit të qeverisë janë rritur, çka lidhet me shtimin e ndjeshëm të kërkesë së qeverisë shqiptare për financim, por edhe me rritjen e perceptimit të rrezikut, pas shpërthimit të krizës së Covid-19.
Rritja e interesave duket e kontrolluar dhe e justifikueshme nga rrethanat, megjithatë Banka e Shqipërisë është e vetëdijshme se shtrëngimi i ofertës për financim dhe rritja e çmimit të parasë është një rrezik real, siç deklaroi të mërkurën Guvernatori Sejko.
Në këto kushte, Këshilli Mbikqyrës parajmëroi se lehtësimi monetar mund të vazhdojë më tej, duke përfshirë edhe skenarin e përdorimit të herë të parë të instrumenteve jokonvencionale. Kjo nënkupton një program të blerjes së titujve qeveritarë në tregun dytësor, sipas modelit të ndjekur vitet e fundit nga Banka Qendrore Europiane.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.