Rritja e huasë në Eurozonë – E qëndrueshme për muajin Prill, përshpejtohet agregati monetar M3
Rritja e huasë në familjet dhe korporatat e Eurozonës ka mbetur e qëndrueshme gjatë muajit Prill dhe treguesi i parasë në qarkullim për bllokun e valutës së përbashkët është rimëkëmbur, tregojnë të dhënat e Bankës Qendrore Europiane.
Huadhënia te kompanitë jo-financiare u rrit me 3.3% në Prill, ndërsa te ekonomitë familjare me 2.9%, normë e pandryshuar nga muaji Mars. Me blerjen e thuajse 2.5 trilionë euro borxh në 3 vitet e fundit, Banka Qendrore Europiane ka ulur kostot e huamarrjes dhe nxitur kredinë, me synim që të nxisë inflacionin.
Ndërkohë që objektivi thuajse është arritur, ekonomia është ngadalësuar së fundmi, duke ngritur dyshimet nëse institucioni do të heqë stimujt monetarë. Kriza politike në Itali ka përkeqësuar ndjesinë e investitorëve dhe rritur kostot e huamarrjes në Itali.
Rritja e huasë, që është përshpejtuar për pjesën më të madhe të vitit, qëndron shumë poshtë nivelin e para-krizës, duke treguar se sektori bankar nuk është rimëkëmbur plotësisht.
Niveli i lartë i kredive të këqija, ku pjesa më e madhe janë trashëguar nga kriza e borxhit në Eurozonë, po nguron bankat që të rrisin huanë drejt ekonomisë reale, ndërkohë që përpiqen të rregullojnë bilancet e tyre.
Rritja vjetore e agregatit monetar M3, që shihet si pararendës i aktivitetit ekonomik, u rrit me 3.9% në Prill, nga 3.7%, sipër projeksioneve të analistëve.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.