Rritja e interesave në Eurozonë – Draghi: Do tregohet durim, normalizimi i politikave do jetë gradual

Presidenti i Bankës Qendrore Europiane, Mario Draghi, tha se institucioni do të tregojë durim në rritjen e parë të normave të interesit dhe do të planifikojë normalizimin e politikave në mënyrë graduale, ndërkohë që pasiguritë janë rritur dhe inflacioni nuk është ende në vargun e duhur. Javën e kaluar, BQE vendosi se do të përfundojë programin prej 2.6 trilionë euro të blerjes së titujve të borxhit në fund të këtij viti, por shtoi se normat e interesit do të qëndrojnë në nivelet aktuale të paktën deri në verën e ardhshme.

“Ne do të tregojmë durim në përcaktimin e kohës se kur do të rriten për herë të parë normat e interesit”, tha Mario Draghi në një konferencë të Bankës Qendrore Europiane. Objektivi i institucionit për inflacionin është në pranë 2%,  por në një periudhë 5 vjeçare ka dështuar ta arrijë atë nivel, pavarësisht stimujve gjigantë.

Ndërkohë që çmimet po rriten dhe BQE pret që të arrihet objektivi deri në vitin 2020, Draghi tha se ka ende pasiguri. Ai shtoi se ndër rreziqet përfshihen; kërcënimi nga rritja e proteksionizmit në të gjithë botën, rritja e çmimeve të naftës dhe luhatshmëria e vazhdueshme në tregjet financiarë. Numri 1 i institucionit tha se rritja e pagave nuk do të reflektohen automatikisht në rritje të inflacionit, duke vënë nën dyshim marrëdhënien tradicionale mes çmimeve dhe pagave.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.