Rritja e investimeve – Vijoi edhe në gjysmën e parë të vitit
Investimet kanë mbështetur rritjen ekonomike edhe në gjysmën e parë të këtij viti. Statistikat tregojnë se investimet kanë vijuar rritjen, mbështetur kjo në ecurinë e importit të makinerive dhe pajisjeve dhe të kredisë bankare për investime.
Sipas Institutit të Statistikave, për shtatë muajt e parë të vitit importi i makinerive dhe pajisjeve arriti në 74.3 miliardë lekë, në rritje me 3% krahasuar me të njëjtën periudhë të një viti më parë.
Një tjetër tregues i tërthortë, kredia e re bankare për investime paraqitet po ashtu në rritje për muajt e parë të vitit 2017.
Sipas Bankës së Shqipërisë, për periudhën janar-qershor, kredia e re për blerje të makinerive dhe pajisjeve dhe e pasurive të paluajtshme nga bizneset arriti në 25.9 miliardë lekë, në rritje me 2.3% krahasuar me të njëjtën periudhë të një viti më parë.
Sipas të dhënave të para nga INSTAT, për tremujorin e parë të vitit formimi bruto i kapitalit fiks u rrit me afro 11% ndaj të njëjtës periudhë të një viti më parë.
Ritmet e larta të rritjes së investimeve kanë qenë mbështetja kryesore e rritjes ekonomike gjatë katër viteve të fundit.
Megjithatë, besohet se investimet private mbështeten kryesisht në pak projekte të mëdha, çka sjell pasiguri për qëndrueshmërinë e tyre në kohë.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.