Rritja e kërkesës për arsimin profesional, Gjermania do të investojë 4,5 mln euro në shkollën e Kamzës
Gjermania do të vijojë të mbështesë arsimin profesional në vendin tonë, me synimin për të shtuar mundësitë e të rinjve për t’u aftësuar për tregun e punës.
Gjatë fjalës së saj në Olimpiadën e aftësive, ambasadorja e Gjermanisë në vendin tonë, Susanne Schütz vlerësoi rëndësinë e formimit profesional.
Ambasadorja e cilësoi si shembull suksesi në Gjermani si për individët, ashtu edhe për kompanitë, ndaj ajo ftoi kompanitë shqiptare të fillojnë të ofrojnë trajnime për të rinjtë, në mënyrë që të fitojnë punonjës të kualifikuar më vonë.
Kërkesa për arsimin profesional është rritur ndjeshëm vitet e fundit dhe numri i aplikantëve në qendrën multifunksionale të Kamzës është sa dyfishi i kapacitetit.
“Gjermania do të japë 4,5 milionë euro për shkollën e Kamzës, në mënyrë që të rehabilitojë dhe përmirësojë godinat, që ato të ofrojnë më tepër materiale mësimore. Do të vazhdojmë ta mbështesim Shqipërinë për të themeluar një sistem formimi dhe arsimi profesional të standardeve ndërkombëtare, për të përmbushur nevojat e tregut shqiptar dhe mbi të gjitha të rinjtë shqiptarë”, tha Schütz
Ambasadorja njoftoi gjithashtu se kompanitë gjermane që operojnë në vendin tonë janë të gatshme të ofrojnë hapësira trajnimi.
Programet e ndihmës gjermane në vendin tonë si GIZ bashkëpunojmë që nga viti 1992 në fushën e arsimit profesional.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.