Rritja e pagave në Eurozonë – Tërhiqet nga niveli më i lartë në 2 vite, vështirëson punën e BQE

Rritja e pagave në Eurozonë është ngadalësuar në tremujorin e tretë nga niveli më i lartë në 2 vite që u prek në periudhën Prill-Qershor. Të dhënat nga Eurostat do të priten negativisht për zyrtarët e Bankës Qendrore Europiane.

Kostot e punës për orë u rritën me 1.6% me bazë vjetore për periudhën Korrik-Shtator, krahasuar me 1.8% rritje në tremujorin e dytë. Pagat patën gjithashtu një rritje me 1.6% për periudhën, krahasuar me 2.1% rritje në tremujorin e dytë, që ishte dhe niveli më i lartë në 2 vite.

Duke e ndarë në aktivitete, rritjen më të madhe në kostot e punës e pati ndërtimi dhe shërbimet, me 2.1%, ndjekur nga industria me 1.5%. Banka Qendrore Europiane po monitoron rritjen e pagave, duke synuar që rimëkëmbja e fortë ekonomike dhe punësimi në nivele rekord, të rrisë të ardhurat duke i dhënë nxitje inflacionit.

Çmimet e ulëta të konsumit përbëjnë një problem për BQE, pasi kanë rënë poshtë objektivit prej afër 2% 4 vitet e fundit, pavarësisht stimujve të jashtëzakonshëm monetarë.

Për Nëntorin, inflacioni arriti 1.5%. Pavarësisht rritjes së punësimit me thuajse 7 milionë që prej 2013-ës, rritja e pagave ka qenë e limituar, dukë vështirësuar punën e politikëbërësve. Sipas disa analistëve, globalizimi mund të ketë dobësuar kontrollin e bankave qendrore te inflacioni.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.