Rritja e tarifave për shërbimet dentare – Ministria e Shëndetësisë padit në gjykatë Urdhrin e Stomatologut

Ministria e Shëndetësisë dhe Mbrojtjes Sociale ka paditur në gjykatën administrative vendimin e Urdhrit të Stomatologut për rritjen e tarifave të shërbimit dentar, duke argumentuarës ka tejkaluar kompetencat që i njeh ligji.

Ky i fundit ka publikuar pak ditë më parë listën me çmimet e reja të shërbimeve dentare, duke shtuar ndër të tjera se kë çmime nuk janë detyruese.

Ndërkohë, po gjatë ditës së sotme ministrja e Shëndetësisë, Ogerta Manastirliu, ka inspektuar Klinikën Stomatologjike Universitare, ku së fundmi është investuar një fond prej 15 lekësh për modernizimin stomatologjik publik. Sipas Manastirliut, ky investim i munguar prej kohësh dhe kryer në një kohë të shkurtër do të rrisë cilësinë e shërbimit.

Më konkretisht në këtë klinikë janë vendosur 8 unite dentare të gjeneratës së fundit, që garantojnë cilësinë më të lartë të shërbimit dhe sterilitet maximal. Gjithashtu, sipas MSHMS, për herë të parë pas shumë vitesh ofrohet shërbimi i punimeve estetike të porcelanit. Si dhe është investuar për modernizimin e shërbimit të Radiologjisë me grafi dixhitale, prodhim i vitit 2017, fjala e fundit e teknologjisë, që kontrollon automatikisht sasinë e rrezeve për pacientin. Me investimet e kryera, për herë të parë në këtë klinikë ofrohet Panoramexi dixhital i teknologjisë së lartë me kontroll automatik dhe kompjuterik të imazhit.

Ndërkohë, ministrja shton më tej se ky investim krahas qytetarëve, iu shërben gjithashtu edhe studentëve të Stomatologjisë.

“Në kuadër të paktit për universitetin, kemi nisur ridimensionimin e  partneritetit dhe ndërveprimin më të ngushtë me Universitetin e Mjekësisë, në mënyrë që të garantojmë sa më shumë cilësi në procesin e mësimdhënies dhe këto investime patjetër i shërbejnë edhe përmirësimit të kushteve për kryerjen e praktikave klinike sipas standardeve”, tha Manastirliu.

Kategoritë në nevojë, duke filluar nga fëmijët, personat me aftësi të kufizuar, familjet në ndihmë ekonomike, përfituesit e institucioneve të kujdesit social i marrin të gjitha shërbimet falas. Ndërsa shërbimet profilaktike, mjekuese dhe mikrokirurgjikale janë falas për të gjithë qytetarët.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.